Դու կարող ես անել դա. «ԵՄ-ն երիտասարդների համար» ծրագրի շրջանավարտները կիսվում են իրենց խանդավառությամբ և փորձով անապահով համայնքներում
Ռազմիկ Մնացականյանն ունի իր համայնքն ավելի ինքնավստահ դարձնելու տեսլական: «Ես պարզապես ուզում եմ, որ բոլորը զգան` «իրենք կարող են անել դա» և որ յուրաքանչյուր իրավիճակ ունի լուծում: Ամեն ինչ կախված է մեզանից, քանի որ մենք ենք մեր ապագայի կերտողները», ասում է նա:
Արագածոտնի մարզի Օշական գյուղից 24-ամյա երիտասարդը, անշուշտ, ինքնավստահության պակաս չունի: Ռազմիկը, ով «Միավորող կամուրջ» ՀԿ-ի հիմնադիրն ու նախագահն է, ինչպես նաև պրակտիկա է անցնում ՀՀ ազգային ժողովում ու սովորում է Հայաստանի ամերիկյան համալսարանի Տնտեսագիտության ֆակուլտետի մագիստրատուրայում, ներգրավված է նաև երիտասարդական գործունեության լայն շրջանակներում, այդ թվում` որպես երիտասարդ եվրոպական դեսպան:
Այժմ նա «ԵՄ-ն երիտասարդների համար» ծրագրի շրջանավարտների ցանցի աջակցությամբ գործի է դնում իր այդ փորձը՝ օգնելով հարազատ գյուղի երիտասարդներին օգտվել այն նույն հնարավորություններից, որոնցից նա այդքան շատ օգուտներ է քաղել: «Մեզ համար անչափ կարևոր է նոր հնարավորություններ տրամադրել նրանց և օգնել մասնակցել ինչպես տեղական, այնպես էլ միջազգային տարբեր նախագծերի»,- բացատրում է նա:
«ԵՄ–ն երիտասարդների համար» ծրագրի շրջանավարտների ցանցը միավորում է ԵՄ երիտասարդական ծրագրերի շահառուներին՝ նպատակ ունենալով նրանց խանդավառությունն ու փորձն օգտագործել հայրենիքում անապահով երիտասարդներին աջակցելու գործում: Ցանցը շրջանավարտներին ապահովում է երիտասարդական աշխատանքի վերաբերյալ ուսուցմամբ և արհեստավարժ երիտասարդական աշխատողների կողմից մենթորությամբ: Դրանից հետո շրջանավարտները ստանում են իրենց համապատասխան համայնքներում բնակվող անապահով երիտասարդների խմբերի համար տեղական նախաձեռնություն մշակելու առաջարկություն՝ այլ շրջանավարտների կամ տեղական ակտիվիստների հետ համագործակցությամբ: Շրջանավարտներն իրենց նախաձեռնության իրականացման համար կարող են ստանալ նաև փոքր դրամաշնորհի տեսքով ֆինանսավորում, ինչպես նաև կազմակերպչական և մենթորական աջակցություն:
Ռազմիկն իր սեփական նախաձեռնությամբ վերադարձավ հայրենի Օշական՝ աշխատելով սակավ հնարավորություններ ունեցող 13-18 տարեկան պատանիների ու երիտասարդների հետ: «Դա ինձ համար մեծ պատասխանատվություն է, քանի որ, լինելով երիտասարդական աշխատող և տվյալ համայնքի բնակիչ, պետք է գործադրես բոլոր ջանքերը՝ հաջողության հասնելու համար, պետք է անես ամեն ինչ՝ համայնքը դեպի լավը փոխելու, իսկ համայնքաբնակ երիտասարդներին՝ ավելի ակտիվ դարձնելու և տարբեր նախագծերում ներգրավելու համար»:
Նա սկսեց աշխատանքը Վրաստանի Ռուսթավի քաղաքում կայացած մեկնարկային դասընթացից անմիջապես հետո: Սկզբում նրա թիմը մի շարք դասընթացներ և գործողություններ կազմակերպեց թիրախային խմբի համար՝ կախված նրանց կարիքներից ու հետաքրքրություններից: «Մենք համայնքում կազմակերպեցինք շրջակա միջավայրի մաքրման օր և մաքրեցինք Օշականի մշակույթի պալատի այգին: Մենք նաև հյուրեր ունեցանք, ովքեր տարբեր թեմաներով դասընթացներ անցկացրին մեր երիտասարդների համար»:
Նրանք նաև երիտասարդական ձեռներեցության նախագիծ իրականացրին՝ եռօրյա ճամբար, որն ուներ ավելի քան 50 մասնակից ՀՀ բոլոր մարզերից, այդ թվում՝ Օշականի թիրախային խումբը: Նախագծի շնորհիվ նրանք ծանոթացան ձեռներեցության հիմունքներին, ինչպես նաև հնարավորություն ունեցան հանդիպելու սոցիալական ձեռնարկություններ հիմնած երիտասարդների:
Եվ, ինչպես Ռազմիկն է հպարտությամբ ամփոփում, նախագիծը շուտով սկսեց պտուղներ տալ. «Այս ժամանակահատվածում մեր մենթիներից հինգը մասնակցեցին ՄԱԶԾ Հայաստանի կազմակերպած «Երիտասարդ առաջնորդների դպրոցին», երկուսը՝ «Եվրասիա» համագործակցություն հիմնադրամի կազմակերպած «Մարդամեջ» սոցիալ – նորարարական ճամբարին, մեկը՝ «Եվրոպական դպրոցական ամառային ճամբարին», երկուսն էլ մասնակցեցին խոշորագույն եվրոպական միջոցառումներից մեկին` Եվրոպայում համերաշխության գործողության օրվա շարժման (SAME) կազմակերպած «Act.ival for future 2021» փառատոնին:
Նախագիծը մեկնարկեց 24 մասնակիցներով, և թվում էր, թե ամեն ինչ լավ է ընթանում. «Կարծում էինք, թե ամեն ինչ հեշտ է լինելու. մենք աշխատելու ենք երիտասարդների հետ ու հասնելու ենք մեր նպատակներին: Բայց վերջին մեկ տարվա ընթացքում բոլորս բախվել ենք բազմաթիվ աղետների, որոնք լուրջ մարտահրավեր էին մեզ համար»,- հիշում է Ռազմիկը:
Սկզբում դա COVID-19-ն էր, և դրա հետևանքով առաջացավ գործունեությունն առցանց տիրույթ տեղափոխելու անհրաժեշտությունը. «Դրա համար մենք ստիպված էինք ինտերնետային կապ ունենալ, բայց կային երիտասարդներ, որոնք չունեին այդ հնարավորությունը: Եվ ես խնդրեցի Մշակույթի պալատի տնօրենին, որպեսզի նա թույլ տա նրանց հաճախել պալատ ու օգտվել տեղի Wi-Fi-ից»: Ռազմիկը նաև ահռելի մեծ ծավալի հետազոտություններ է կատարել առցանց հանդիպումներն ավելի ներառական և արդյունավետ դարձնելու վերաբերյալ:
Մյուս մարտահրավերը պատերազմն էր. «Պատերազմից հետո բոլորին հավաքելը մեծ խնդիր էր, քանի որ մասնակիցների շրջանում առկա էր դեմոտիվացիա»:
Ռազմիկը ստիպված էր «խորը փորել» իր ծրագրի մենթոր Աննայի աջակցությամբ («Առանց նրա ես գլուխ չէի հանի»), իսկ այնուհետև՝ շրջանավարտների ցանցի երկրորդ անդամի՝ Քրիստինեի կարողությունների զարգացմամբ: Վերջինս նախագծին միացավ պատերազմից հետո:
«Իհարկե, ես թույլ եմ տվել սխալներ, բայց, միևնույն ժամանակ, շատ լավ արձագանքներ եմ ստացել իմ մենթորից և շրջանավարտների ցանցում իմ ընկերներից: Նրանցից շատ բան սովորեցի, ինչը, անշուշտ, կօգնի ինձ իմ հետագա ծրագրերի ընթացքում»:
Այժմ Ռազմիկն ու Քրիստինեն աշխատում են խմբի համար նոր գործողություններ մշակելու ուղղությամբ: «Մենք նախատեսում ենք տարբեր դասընթացներ, մասնագիտական կողմնորոշման վերաբերյալ հանդիպումներ, շախմատի և ֆուտբոլի մրցումներ և ոչ միայն: Ուստի խաչեք ձեր մատները և հետևեք հետագա զարգացումներին»:
Ու թեև երիտասարդներից մի քանիսն անցել են իրենց ավարտական քննություններին նախապատրաստվելուն, Ռազմիկն իր գործողությունների ազդեցության վերաբերյալ լավատեսական գնահատականներ է հնչեցնում. «Օշականցիները սկսել են լսել մեր երիտասարդների հաջողությունների մասին, ինչը նրանց ավելի ակտիվ և մոտիվացված է դարձնում՝ մեր գործողություններում ներգրավվելու առումով»:
«Դու իսկապես կարող ես անել դա»,- կրկնում է Ռազմիկը: «Իմ՝ որպես երիտասարդական աշխատողի տեսլականը մեր հասարակությունն ավելի ինքնավստահ և ինքնուս դարձնելն է»: Ռազմիկը և «ԵՄ-ն երիտասարդների համար» ծրագրի շրջանավարտների ցանցն Օշականում հենց դա են անում:
ԱՄԵՆԱԿԱՐԴԱՑԱԾ
ԱՌՆՉՎՈՂ ԹԵՄԱՆԵՐ
Ո՛չ, ժամանակը Ռուսաստանի օգտին չի աշխատում
Շոկոլադի անուշ բույրը
«Վստահիր ինքդ քեզ և միշտ առաջ գնա»․ երիտասարդ ձեռներեց Մերիի խորհուրդը կանանցև աղջիկներին
Ցանցահենից մեկ քայլ առաջ. Ծանոթացեք կիբեռանվտանգության պարզ խորհուրդներին
Հմտությունների ուժը. Հայաստանի գյուղական վայրերում կանայք սեփական բիզնեսի համար ճանապարհ են հարթում
Սույն կայքում առկա տեղեկատվությունը կարգավորվում է պատասխանատվության սահմանափակման և անձնական տվյալների պաշտպանության մասին դրույթներով:
© European Union,
