Azərbaycanda keçiriləcək Avropa məktəbi üçün ərizə qəbuluna başlanılıb

Avropa İttifaqının (Aİ) Azərbaycandakı Nümayəndəliyi Azərbaycanlı gəncləri bu ölkədə 5-ci dəfə keçiriləcək Avropa məktəbində (EuroSchool) iştirak etməyə dəvət edir. 2-4 avqust 2022-ci il tarixlərində keçiriləcək bu ilki məktəb Azərbaycanın rayonlarından birində təşkil olunacaq. 

İştirakçılar interaktiv formada Aİ, onun tarixi, fundamental prinsipləri və dəyərləri, qanunvericiliyin uyğunlaşdırılması və uzlaşdırılması prosesi, enerji və ətraf mühit məsələləri, Avropa Qonşuluq Siyasəti, Şərq Tərəfdaşlığı təşəbbüsü və Aİ-Azərbaycan münasibətləri haqqında ətraflı öyrənmək imkanı əldə edəcəklər.

Bundan əlavə, “EU NEIGHBOURS east” proqramının nümayəndələri iştirakçıları Gənc Avropa Səfirləri şəbəkəsi ilə tanış edəcəklər. Bu şəbəkədə Aİ-yə üzv dövlətlərdən və Azərbaycan daxil olmaqla Şərq Tərəfdaşlığı ölkələrindən fəal gənclər toplanıb.

Təlimlər İngilis dilində keçiriləcək. Aİ-nin Azərbaycandakı Nümayəndəliyi iştirakçıları Bakıdan rayonlara nəqliyyat vasitəsi, qidalanma və gecələmə (ikinəfərlik otaqlar) ilə təmin edəcək.

Seçim meyarları:

• 18-25 yaş arası Azərbaycan vətəndaşları;
• Universitet tələbələri və ya məzunlar;
• İngilis dilində sərbəst danışıq;
• Beynəlxalq münasibətlər, Avropa İttifaqı, siyasi elmlər, beynəlxalq ticarət, təhsil və ya enerji məsələlərində maraqlı olan şəxslər;
• Avropa məktəbində tam iştirak etmək imkanı olan şəxslər;

Müraciət üçün son tarix iyunun 19-dur.

Daha çox öyrən

Mətbuat üçün açıqlama