Azərbaycan: Aİ və BMTİP iyun ayında Bakıda Peşə təhsili üzrə festivalın təşkilini dəstəkləyəcək

İyunun 10-da Peşə Təhsili üzrə Dövlət Agentliyi, Avropa İttifaqı (Aİ) və BMT-nin İnkişaf Proqramının (BMTİP) birgə əməkdaşlığı ilə Bakıda “Bir peşənin sirri” adlı festival təşkil olunacaq. Festival Dənizkənarı Bulvar ərazisindəki “Saat meydanı” yaxınlığında keçiriləcək.

Tədbirin keçirilməsində əsas məqsəd peşə təhsili haqqında məlumatlılığı artırmaq, gənclərin, valideynlərin və digər maraqlı tərəflərin bu prosesə cəlb edilməsini təşviq etməkdir.

Festivalda qonaqları peşə təhsil müəssisələrinin turizm, sənaye, sənətkarlıq, kənd təsərrüfatı, İKT və ictimai iaşə istiqamətlərində təhsil alan tələbələrin əl işlərindən ibarət sərgilər və ustad dərsləri gözləyir. Bununla yanaşı, tədbir iştirakçıları üçün “WorldSkills Azerbaijan” platforması çərçivəsində əyləncəli oyunların və viktorinaların keçirilməsi nəzərdə tutulub.

Festivala Aİ tərəfindən maliyyələşdirilən və BMTİP tərəfindən Peşə Təhsili üzrə Dövlət Agentliyi ilə birgə həyata keçirilən “Gələcək üçün Peşə Təhsili və Təlimi: Azərbaycanda Qabaqcıl Peşə Təhsili Mərkəzlərinin yaradılmasına dəstək” layihəsi dəstək verir.

Daha çox öyrən

Mətbuat üçün açıqlama