Avropa Komissiyası Rusiyaya qarşı doqquzuncu sanksiya paketinin layihəsini təqdim edib
Dekabr 9, 2022

Avropa Komissiyası Rusiyaya qarşı doqquzuncu sanksiya paketinin layihəsini təqdim edib


Avropa Komissiyasının Prezidenti Ursula von der Leyen Rusiyaya qarşı doqquzuncu sanskiya paketinin qəbulu ilə bağlı çıxış edib.

Komissiya Aİ-nin sanksiyalar siyahısına daha 200-ə yaxın fiziki və hüquqi şəxsin əlavə edilməsini təklif edir. Buraya Rusiya silahlı qüvvələri, eləcə də ayrı-ayrı zabitlər və müdafiə sənayesi şirkətləri, Dövlət Dumasının və Federasiya Şurasının deputatları, nazirlər, qubernatorlar və siyasi partiyalar daxildir. “Bu siyahıda Rusiyanın mülki əhaliyə qarşı qəddar və qəsdən raket zərbələri endirməsi, ukraynalı uşaqların Rusiyaya qaçırılması və Ukraynanın kənd təsərrüfatı məhsullarının oğurlanması ilə bağlı əsas rəqəmlər yer alır”, – Komissiyanın mətbuat üçün açıqlamasında deyilir. 

Komissiya “Putinin nağd pul mənbələrini daha da iflic etmək üçün” daha üç Rusiya bankına qarşı sanksiya tətbiq etməyi, o cümlədən Rusiya Regional İnkişaf Bankı ilə əməliyyatlara tam qadağa tətbiq etməyi təklif edir.

Eyni zamanda, Komissiya xüsusilə ikili təyinatlı mallar üzrə yeni ixrac nəzarəti və məhdudiyyətlərin tətbiqini təklif edir. Buraya Rusiyanın müharibədə istifadə edə biləcəyi əsas kimyəvi maddələr, sinir-paralitik maddələr, elektronika və İT komponentləri daxildir.

Sanksiyalarda həmçinin Rusiyanın hər cür dron və pilotsuz uçuş aparatlarına çıxışının qarşısını almaq nəzərdə tutulub. Komissiya dron mühərriklərinin Rusiyaya birbaşa ixracını qadağan etməyi və Rusiyaya pilotsuz uçuş aparatları verə biləcək İran kimi üçüncü ölkələrə ixracı qadağan etməyi təklif edir.    

Rusiyanın energetika və mədənçıxarma sektoruna qarşı təklif edilən iqtisadi tədbirlərə Rusiyanın mədən sənayesinə yeni investisiyaların qoyulmasına qadağa daxildir.

Ursula von der Leyen bildirib ki, Komissiya Rusiyanın daha dörd televiziya kanalının və bütün digər platformalarının yayımını dayandırmağı təklif edir.  

O əlavə edib ki, təklif olunan paketdə Aİ-nin Rusiyadan dəniz vasitəsilə neft idxalına tətbiq etdiyi tam qadağanı (bu həftə qüvvəyə minib), eləcə də G7 ölkələri arasında razılaşdırılmış və qlobal neft qiymətlərinə tətbiq edilən məhdudiyyəti tamamlayır. 

“Rusiya Ukraynadakı qətlləri və dağıntıları davam etdirir. Biz Ukraynanı dəstəkləyirik və Rusiyanın vəhşiliyinin əvəzini ödəməyə məcbur edirik”, – deyə Leyen qeyd edib.

Daha çox öyrən

Mətbuat üçün açıqlama



ÇOX OXUYUR



Son xəbərlər və iştirak imkanlarında maraqlısınız?

Bu internet səhifəsi Avropa İttifaqı tərəfindən maliyyələşdirilən Şərq Qonşuluğu üzrə Regional Kommunikasiya Proqramı ("'EU NEIGHBOURS east") 2020-2024 tərəfindən idarə olunur. Proqram Şərq Tərəfdaşlığı ölkələrindəki Avropa İttifaqı Nümayəndəlikləri arasında məlumat mübadiləsini tamamlayır və dəstəkləyir, eləcə də Avropa Komissiyasının Qonşuluq Siyasəti və Genişləndirmə Məsələləri üzrə Baş Direktoratı və Avropa Xarici Fəaliyyət Xidmətinin rəhbərliyi altında fəaliyyət göstərir. Proqram GOPA PACE-un rəhbərlik etdiyi konsorsium tərəfindən həyata keçirilir.


Bu məlumat Məsuliyyətdən imtina və Şəxsi məlumatların qorunmasına dair qaydalara tabedir. © European Union,